萬眾期待嘅台慶劇「宮心計」終於開播喇，而呢類劇集又係我最鈡意睇嘅，因為劇組陣容龐大而且個劇情有夠吸引。
其實我睇劇嘅期望係，好人要有好報，雖然啲好人都會俾啲奸人折磨，然後小人又會得道一段時間，我最鈡意睇奸角喺折磨啲好人時候嘅嘴臉越得戚越好（因為飆演技所需），咁到結局就可以睇到佢哋後悔當初嘅樣，心裡面就會舒服。
而今日又學咗一句諺語，出處係英國國徽上「Honi soit qui mal y pense」（原文係法文），中文翻譯為「惡有惡報」。
講返學習，仲有唔夠兩年就畢業，我知道自己心中已經有啲比較確定嘅目標，而經過一啲事件之後我發覺我呢啲目標應該更加明確先得。
其實有時外界好多唔係太知道實情嘅人都會對內情有一定誤解，但係又唔需要解釋太多。
好多唔正確嘅理解，喺腦海中一旦形成就好難改變，但係如果抱住一份想徹底理解嘅心態總有一日會因為瞭解而豁然開朗。
更多嘅人會鈡意用呢份誤解去嘲笑或者蔑視對方，正如我上面所提及，好多壞人都只不過係暫時可以得戚一下，引用返我哋中學英文老師嘅口頭禪「Those who laugh last, laugh best」。
我呢個時候已經唔可以話將所有科目學好，應該要將重點放返喺一啲比較重要嘅科目。
我已經唔指望日後做學術工作者。研究工作係一件相當艱巨嘅任務，特別係做科學理論研究，大多數科學理論喺現實生活嘅作用係唔明顯嘅，所以需要一個高度抽象嘅腦袋。
但係至今我又好崇拜科學，好多事都希望可以用一個比較科學同理性嘅方法解決，正如某啲教授話我哋讀大學係要鍛煉一個理性嘅腦袋。又因為咁我就有咗一個好強大嘅信念讓我去選咗大量嘅數學同邏輯課程，而冇選擇較容易得分嘅文史類課程。
然而我做某啲決定之前我仲好疑惑自己得唔得掂唔掂而躊躇不前，但係我仲係相信，至少呢個會係一場賭博，如果我冇重重落注嘅話，連讓別人或自己清醒嘅機會都沒有。
我相信，他朝有日某啲人一定會萬分驚詫，如果佢哋係抱住一夥邪惡之心嘅話。
