睇黎大家都對個廁所幾有興趣~咁我今日就講小小廁所啦~
飛機上既廁所同一般既廁所好唔同~
首先, 就係馬桶既入面同出面係唔同既材料做既, 飛機上係要節省用水, 因為有時係飛行途中既水, 無左就係無左, 係無得話補就補架。
所以當去完廁所沖水既時候, 就無可能好似家居既廁所咁, 剩係靠水壓沖走穢物。而馬桶入面使用左特別滑既材料黎建內壁, 就係用黎幫到手慳水既; 當客人辦完大事, 就會"滑~~"左果d唔要既野去到桶底, 再黎只係需要好小既水沖走桶壁既穢物, 咁當一沖廁既時候, 機上既真空系統一抽, 就會抽得乾乾淨淨~
所以大家去過飛機既廁所都會記得個馬桶入面係無水既, 正正就係因為飛機上既廁所係真空抽水既設計, 所以唔需要好似家居廁所咁, 長期有d水係桶入面。
試過好多客人, 見唔到入面有水, 特登走黎話我知個廁所壞左...又試過, 有客人專登幫我地加返d水入馬桶度...真係唔知好嬲定好笑...
咁抽去走左既野又會去左邊? 唔通一飛過太平洋就會掉晒大家既便便落海? 定係飛機有個系統會自動分解晒d便便?唔係講笑...有人真係問過我, 飛機係唔係有完善既過濾系統, 咁排出既過濾完就.......
呢個問題就遲下再打~我就開始今日既standby 啦...好緊張呀~~~~~唔好call我唔好call我唔好call我~~~~
