我估今日都唔call多既, 而家仲有4個鐘就完啦~~我好眼瞓...
等我解釋下咩叫standby啦~大家照字面解既都估到, standby就係「備用」咁上下意思。
係我地e行, 每一日都有一定數量既crew係屋企standby架, 因為當有同事病左請假或者航班轉機種而需要更多人手既時候, 就係standby crew上場之時~~~
公司會係安排我地係2-3個月左右就會有為期5-9日既standby時段, 而每日都有你需要等待既時間, 可以係早上五點開始...又可以係晚上一點完結...咁我地standby既日子到底要做咩呢?點解咁多crew都咁怕standby 呢?
原因就係...standby完完全全咁補捉左人類既恐懼點...正正表現左咩叫"不可預計既未來"...
你唔會知道幾時有電話到, 唔會知道你要飛去邊, 唔會知幾時返, 唔會知道要帶d咩, 唔會知道同咩人飛, 唔會知道係機上要做咩位置, 唔會知道當電話一到你有幾多時間返工...你做到既就係...係屋企準備好大慨要用既野, 之後...等電話...
大家睇字面左都明白頭個六樣既未知係咩啦...而最令人頭痛既就係"唔會知道當電話一到你有幾多時間返工..."呢一點...真係令人頭都大...曾經有人試過係飛機起飛前一個鐘先收到電話...趕頭趕命咁先返到公司...一去到機場就即係起飛...; 亦有試過一次, 公司一早就打左比我, 同我講話今日要飛一班台灣既即日來回, 點知過左一陣, 又變左台灣既overnight...當我返到公司準備開會, 佢又抽返我出黎...同我講..."你今日返返屋企先, 聽日飛星加玻..."
雖然係咁, 但有時都唔可以唔佩服呢一個standby既系統, 試諗下, 航空公司同一般公司唔同, 唔可以話...今日有人病左, d野做唔晒而留返聽日, 有人病既時候, 公司就要分秒必爭咁叫人返黎返工...因為當人手不足, 而客人又係full-load既時候, 真係會令當值既一班同事頭都痕埋, 做到氣咳...而公司更無可能為左一個員工, 而令三百幾個客人飛唔到...所以一收到call, 我地即使得好短既時間, 都要仆倒返去...
但另一方面, 我身為crew, 當然好明白大家係面對密密麻麻既更表時, 時差係兩日之內真係可以由GMT+9變左GMT-8, 咁樣身體的確會好易病...而有某d航班與航班之間更係得好短時間休息, 長期咁飛既話的確會捱唔住...
我地病左當然就要請假...因為係機上面, 大家都係焗係一個好細既空間, 空氣又唔流通, 人同人之間好易傳播病菌, 加上我地一個crew平均服務至少50位客人, 如果我地帶病返工, 分分種就會變左病毒散播機...
所以每次我頂唔順要請病假, 都盡可能早半日至一日通知公司, 至少等standby緊既同事可以早d收到通知要頂d咩機, 而唔駛趕得咁辛苦~好過係屋企等到發霉...又唔出得街...又唔知要唔要飛咁痛苦呀...
打完都仲有3個幾鐘今日既standby先完...快d啦...我想去落樓下買豆腐花食呀...~~諗起都肚餓...
